Fotografías novos pratos

Ola! Aquí podedes ver fotografías dos seguintes pratos:

Ensaladas multicolor, italiana, de queixo fresco, de rúcula e picatostes.

– Pizzetas vexetais.

– Lirios con ensalada.

– Solombiños de porco con salsa agridoce de mostaza.

– Tortiñas de peixe con tomate e especias.

Filetes de xarda con salpicón de remolacha e cítricos.

Ao entrardes na galería, veredes que en cada foto aparece o nome identificando o prato. Bo proveito!

 

Volta á carga!

Ola de novo! Isto é un anuncio de reapertura.

Esta fin de semana abrimos segundo o horario de costume e, durante a semana de festas que vén, estaremos abertos todos os días a mediodía e damos mesa con reserva previa pola noite. Podedes ir chamando: 986-862-275.

Aquí unha fotiño das verduras ecolóxicas recén traídas do Alcoubo de Zacande para conquistarvos. E vaia por diante que a estes produtos as fotos nunca lles fan xustiza.

verduras alcoubo de zacande

Danza africana

ATENCIÓN: O taller promocional trasládase finalmente ao luns 17

Continúa a programación de actividades co comezo das clases de danza africana, dende este mes de marzo. Serán impartidas por Cristina Malvárez de Biomesturas Danza, que xa é coma unha persoa máis da casa, e terán lugar os luns entre as 20:30 e as 22:00. Para iniciarvos e convidarvos a vir, amais, dámosvos toda a facilidade, comezando cun taller promocional (luns 10) para probedes e decidades se vos gusta este tipo de baile, e para o que a achega económica será voluntaria: a que vós queirades.

Clases afro Africano en a Casa de Ana

Agora, vedes que nas publicacións que facemos aquí para presentar as cousiñas que programamos gústanos suxerir onde pode radicar o seu interese ou que clase de emocións pode provocar. Porén, Cristina pasounos un texto que ela xa tiña preparado, e que transmite todo iso moito mellor do que o saberiamos facer nós. Para saber realmente que vos pode aportar aprender esta danza recomendámosvos lelo a continuación: Modalidad danza africana.

Polo demais, toda a información que precisedes podédela obter chamando ao teléfono de Cristina que vedes aquí enriba no cartel (658937556), ou ao noso de sempre (986862275).

Unha aperta e a seguir inventando!

Taller de baile de Entroido

Haberá moitos e moitas de vós que dende a fin de semana que vén teredes pensado poñer o disfraz e saír á rúa a deixarvos levar, non si? E seguramente causar impresión e protagonizar algún momento estelar da festa! Para iso non está de máis engadir ao talento e ao encanto persoais, algo de preparación e algúns pasos novos.  O Entroido é unha festa para gustarse, así que hai que sacudir o medo ao ridículo como sexa.

Pensando nisto, á profe Cristina ocorréuselle que sería unha boa idea dar unhas poucas leccións do que ela domina, os bailes latinos (amais da danza africana, que axiña tamén programaremos..), antes mesmo das datas clave. Durante unha hora e media longa axudaranos a poñer o pé de entrada na samba, na bachata, no merengue… Podedes ver os detalles aquí debaixo, no cartel que preparamos. Tamén é unha boa oportunidade para saber se vos prestaría apuntarvos a unhas clases de baile regulares, no? As cousas hai probalas.

Amais tedes que saber que, como nos gusta facer as cousas en condicións, temos espellos novos na parede. Xa somos case unha humilde escola de danza! Francisco e o seu alumnado xa os estiveron a utilizar nas clases de flamenco, das que podedes ver algunha foto no noso Facebook.

Apuntádevos!

baile entroido

Clases de flamenco

Hoxe presentamos a primeira novidade do ano.  Fainos ilusión porque é unha iniciativa chegada de fóra, que parte do interese dunha amiga da Casa chamada África, á que puidemos dar lugar cun chisquiño de coordinación: mentres nós contactabamos con Francisco, (gaditano e profesional do flamenco dende hai moitos anos) para dar a clase, ela ía xuntando o grupiño de alumn@s. E sen moito máis, conseguimos así programar as  primeiras clases de danza.

O grupo comezará o primeiro martes de febreiro e aínda hai sitio se vos animades. Botade un ollo ao cartel. Se queredes máis información, podedes chamar ao noso número ou ao de Francisco, que figura ao pé da imaxe. Saúdos!

cartel flamenco

Festa Fin de Ano

Non se sabe o que pode pasar. Mellorar tal e como están as cousas non é difícil, pero tamén é certo que para os que gobernan o listón dos desastres parece non estar nunca o suficientemente alto; siguen saltándoo e mellorando a súa marca día a día. Pero, sexa como for e veña como veña dende fóra, en cada ano que comeza tamén hai unha parte moi importante de determinación persoal, de punto de vista. Pódese tomar ata coma un xogo. Imaxinade que o 2014 é un anaco de plastilina: que forma lle damos?

A nós ocorréusenos mirar 0 2014 coma un globo, un globo aerostático. Humilde, enxeñoso, lixeiro, colorido, viaxeiro e que se eleva polo aire e suca as nubes (e os nubarróns tamén como pode). E a festa para rematar este no que estamos, pois acorde con esa idea. Vale un pouco todo: podedes pinchar vós mesm@s a música que vos guste, traer instrumentos dende a guitarra á botella de anís,  vir de gala ou de paisano

Estaremos dende as 01:15 ata… Ben, ata cando nos pareza. Mirade que as 50 primeiras entradas van saír máis baratas, así que ide matinando para mercar dende luns. Barra libre e chocolate matutino a pouco prezo.

Para o que precisedes, os contactos habituais: acasadeana@gmail.com // 986862275

Felices festas a todas e todos!

fin de ano